Birgitta Nicolas
Í marsmánuði dvaldi Birgitta Nicolas í Herhúsinu. Birgitta er grafískur hönnuður og hefur unnið við að myndskreyta m.a. barnabækur.
Hún býr í bænum Schwerte í suðurhluta Þýskalands.
Susanne Liessegang og Marianne Hopf
Þýsku listakonurnar Susanne og Marianne dvöldu í Herhúsinu í febrúar. Marianne er málari og hefur siglfirskt landslag ratað á strigann hjá henni undanfarin tvö ár.
Myndir hennar eru m.a. á heimasíðunni http://www.mariannehopf.de/
Listaháskólinn
Nemar á síðasta ári Listaháskóla Íslands ásamt kennara voru í listasmiðju hjá Aðalheiði Eysteinsdóttur í Alþýðuhúsinu á Siglufirði í hálfan mánuð í janúar 2019. Nokkrir dvöldu í Herhúsinu. Opið hús var haldið þar sem ýmsar listir voru stundaðar og sýndar.
Anne- Luft
Anne sem var gestur Herhússins í desember hefur lengi haft áhuga á íslenskum þjóðlagaarfi og er að vinna að verkefni sem tengist tónlistararfi nokkurra landa. Hún hefur heimsótt Ísland á síðustu árum til að afla sér efnis. Sumarið 2018 var hún á Siglufirði og myndaði og hljóðritaði á Þjóðlagahátíðinni. Í Herhúsinu vann hún við að setja saman það sem hún hafði myndað, auk þess sem hún bætti við efni, tók upp tónlist, kveðskap og viðtöl við fólk.
Kirsten Rian
Kirsten Rian var nóvembergestur Herhússins. Hún kemur frá Portland, Oregon. Hún var í Herhúsinu árið 2014 og þá vann hún m.a. að bókinni Life Expectancy: sem kom út árið 2015. Bókin kom þá út í takmörkuðu upplagi en var valin til útgáfu árið 2018 (Pacific Northwest Writers Series - Redbat Press). Hún vann við skriftir, málun og sem reyndur ljósmyndari og sýningarstjóri til margra ára, kynntist hún starfsmönnum ljósmyndasafns Siglufjarðar og aðstoðaði þar sem sjálfboðaliði við skráningu og varðveislu gamalla ljósmynda.